Тәрбие – тал бесіктен. Анадан шыр етіп дүниеге келген күннен бастап ата-ананың тәрбиесі нәресте бойына қалыптаса бастайды. Міне осы күннен бастап нәрестенің жанұя ортасындағы жас ерекшелігіне байланысты тәрбиесі қалыптасады. Нәрестенің даму процесіндегі әрбір қимыл әрекеттері, істеген қылықтары үйдегі яғни отбасындағы ортамен тығыз байланыста болады. Айталық, сәбидің былдырлап тілі шыққаннан бастап сөзді дұрыс айтқызу тәрбиесінің алар орны бір бөлек. Мәселен, ойната отырып ойлату баланың тілінің дұрыс шығуына, сәбидің тілін дамыту да ата-ананың атқаратын қызметі зор. Сәбидің ойын ата-ана толық тыңдап, әрине, ат үсті тыңдамай, асықпай сұрағына жауап беріп отырса, тілі жаңа шығып келе жатқан сәбидің сөйлеу дағдысы дұрыс қалыптасады. Әрбір ата-ана сәбиінің жан-жақты дамып дұрыс тәрбиеленуіне зор ықыласпен, қырағылықпен, сабырлылықпен мән беріп отыруы керек. Баласын дәретсіз емізбеген Зере әжеміз сияқты, Құнанбайдан дана Абай атамыз дүниеге келгені сияқты әрбір әже өз отбасында немерелеріне қызықты әңгімелерін, ертегілерін айтып, тәрбиелік мәнін ашып отырса, бала өз дәрежесінде толық қанды дамып, ол тәрбие балабақшада жалғасын табады. Ал балабақша мемлекеттік балалар тәрбиесінің ортасы. Балабақшада отбасындағы тәрбиені әрі қарай дамытып, ұштастыратын тәрбиеші. Сәбилік кезеңнен бастап, ересектер тобына дейін осы балабақшада тәрбиеленеді. Тәрбиеші апайлардың басшылығымен тәрбиенің бірнеше түрі қамтылады. Балабақшадағы өтілетін ата-аналар жиналысындағы, күн тәртібінде жүргізілетін өзекті мәселелер де тәрбиемен тығыз байланыста болуы керек. Содан кейін ағымдағы мәселелер сөз болуы тиіс. Ата-ана мен тәрбиеші тығыз байланыста болса, бауыр етіміз баламыздың рухани азықтанып, тәрбие баспалдағы жоғарылай отырып, білім мен тәрбиенің қайнар көзі алтын ұямыз мектепте жалғасады. Балабақшадан шығып аяулы да, ардақты тәрбиешілермен қоштасқан бүлдіршін білім ордасы алтын ұя мектептің табалдырығын аттап жаңа ортаға, шәкірт жүрегіне жылы жол табатын аяулы ұстаз қарсы алады. Білім мен тәрбиенің қайнаған ортасы, тәрбие бастауы мектепте өз үндестігін табады. Бастауыш сыныпта жүргізілетін әр түрлі тәрбие жұмыстары орта буын сыныптарда да жас ерекшелігіне сәйкес жалғасып, жоғарғы сыныптармен тығыз түрде ұштасып отырады. Әрине, бұл мектепте жүргізіліп отыратын тәрбие жұмыстарына үйден әрбір ата-ана да ат салысып араласып отыруы керек. Ұстаз бен ата-ана «бір жағадан бас, бір жеңнен қол шығарып» тығыз байланыста отырып жұмыс жасайтын болса, Тәуелсіз Республикамыздың болшақ тізгінін ұстар ұрпақтары сауатты да, салауатты болып өсуіне күмән жоқ. «Тәрбие бастауы-тал бесіктен»басталып алтын ұя мектебімізде тыныштығымен тербетіле берсін.
|