| Білім саласында жұмыс істеген соң, әр таңымыз ізденіс пен талпыныста өту керек сынды. Осы мақсатқа менің де арманым ұштасса керек. Таңдағаным ұстаз болу, болашақ ұлтжанды ер – азамат тәрбиелеп өсіру болғандықтан заман ағымынан қалып қоймай, алдымдағы оқушылардың қараңғы болып қалмауы үшін мен де көш желісінен қалыспау керекпін. Осының бір дәлелі ретінде 27 шілдеден басталған бағдарламаның бірінші(ілгері) деңгейінің шеңберінде 3 айлық курсқа бастаған алғашқы қадамым еді. Білімімді кеңейтіп, тәжірибемді жетілдіру менің басты ұстанымым еді. Алғашқы күні 1-топ болып бөлінгенімізді, топ тренері Балқадиша Каримовна екендігін естідік. Жан – жақтан жиналған ұстаздар қауымы бірден тіл табысып, үйренісіп кеттік. Сол күні оқыту дегеніміз не? Ол қалай жүзеге асырылады? Сынды сұрақтар төңірегінде ой қозғап, пікір алмастық. Мұғалімдердің өзара ынтымақтастық пен өзара іс – әрекеттегі жұмыс маңыздылығы айтылды. Топтарға бөлініп отырып, мінсіз оқушы қандай болу керек? деген тақырыпта топпен сурет салып, ойларымызды ауызша кезекпен түсіндірдік. Әр адам сөйлеген сайын топ ережесі есімізде болды. Яғни, ешкімнің сөзін бөлмеу, жоқ деп айтпау, кезекпен сөйлеу. Әр оқушы бойында бар дарындылық, ептілік пен ерекшелік қасиеттерді үздік ұстаз ғана байқай алады. Олардың эмоциялық, әлеуметтік және танымдық әрекеттерін де жіті ұғына білген абзал екен. Топтық жұмыстар арқылы оларды бірлестікке, достық пен жанашылылыққа баулуға болады. Мінсіз оқушы ең басты – отбасы тәрбиесінен негізделетінін де айта кету керек. Топтық жұмыс жүргізудің 3 түрі бар екен. Бірі үлкен топ, бірі шағын топ болады. Құрамында 4-5 оқушыдан тұрады. Топпен жұмыс жүргізудің нәтижесінде оқушылар бір – біріне көмектеседі, қолдау көрсетеді, ойларын түсінеді. Осыған сай мұғалімдер де өзгерулері керек. Заманға сай болу үшін жаңа техниканы меңгерулері қажет. Бізге тәжірибе беру мақсатында ашық сабақ үлгілері де интерактивті тақта арқылы көрсетілді. Бақылаушы, тыңдаушы, үйренуші болып 3 адамнан тұратын топ құра отырып, өз білетіндерімізді өзгемен бөлісу үшін тәжірибе алмастық. 7 модуль арқылы сабақ жүргізу, осы қағидаттарға сүйену басты құралымыз екендігін түсіндік. Жан – жақты пікір алмасып, ой бөлістік. Тренер айтқан ақпарат пен қасымыздағы адамның пікірлері өзіміздің пікірге ұласа отырып, біраз мәліметтермен қанық болдық. Бүгінгі таңда кешегі дәстүрлі сабағымыз бен осы әдіс – тәсілдерді салыстыра отырып, өзімізді сыныпта мұғалім деп санап, өз білетінімізді ғана айтып, оқушының еркін сөйлеп, ойын ашық айта білуге, өзін – өзі бағалауына мүмкіндік бермеген екенбіз деген ой келді. Сондай – ақ талантты және дарынды оқушыларды анықтай білу және осы бойларындағы қасиеттің одан ары жандануына жол аша білу қажетпіз. Сын тұрғысынан ойлата отырып, проблемалық сұрақтар қоя отырып, оларды сыни ойлауға үйрету. Содан жан – жақты саралай алатын, пікірін ашық айтатын, өзін – өзі бағалай білетін өскелең ұрпақ тәрбиелеу. Функционалдық сауаттылықтың осы орайда маңызы зор болса керек, себебі тек қана айта бергеннен көзімен көрген ақпаратты көбірек сақтары анық. Сол үшін интерактивті тақтаны, сандық фотоаппараттар мен өзге де техникалық жабдықтар пайдаланған жөн. Осының барлығын тұжырымдай келе өзім үшін көп ақпарат алдым. Білмеген технологиялар бойынша хабар алып, жаңа заман ұрпағын тәрбиелеу жолдарын үйрендім. Өзім сынды мұғалімдермен пікір алмаса отырып, тәжірибеме көптеген өзгерістер енгіздім деп санаймын. Алдағы уақытта осы айтылғандардың барлығын пайдаланып, жақсы сабақтар жүргізіп, жаңашыл мұғалім болуға тырысамын деген ойдамын. Ең бастысы балаға бостандық бере отырып, ой еркі мен сөйлеу еркінен шектемеу керек, сонда ғана білім шыңына жетеріміз анық.
|